Gleðilegt sumar!

Ég óska ykkur öllum gleðilegs sumars og vona að það verði gæfuríkt og gefandi... væmið!! En alla vega sumarið er komið með sól og blíðu... það fraus nú samt saman við veturinn í nótt og eins og vitrir (lesist gamlir) menn segja þá bendir það til góðs veðurs í sumar. Það kemur í ljós en ef ekki verður gróðurhúsaáhrifum örugglega kennt um eða El Nino. Við erum búin að ákveða hvað verður gert í sumarfríinu og ætlum við að leggjast á ættingja og vini þvers og kruss um landið okkur til skemmtunar. Annars verður hangið heima og lagað það sem laga þarf og kannski farið í landlagsarkitektúr í garðinum.

Ég er ástfangin...

Af fjöldamorðingja! Ég er búin að lesa eina bók um hann, mér skilst að þær séu þrjár, og ég féll alveg fyrir honum. Húmorinn er svo skuggalega svartur og kaldhæðinin er yndisleg. Svo skemmir ekki fyrir að skjár 1 sýnir þessa þætti með leikara sem smellpassar í hlutverkið... Ég beinlínis slefa og ef ég væri með leðursófa myndi ég renna út af honum á sunnudags-kvöldum. Það er eitthvað við það að vera svo illur en ná að fela það svona vel. Og svo það hvernig fóstra hans tókst að beina þessum hvötum hans til "góðs" með því að drepa bara "vonda" kalla. Og svo kaldhæðnin eða hvað það á að kallast hvernig hann elskar börn. Það er alveg að bræða móðurhjartað hvað hann virðist hafa endalausa þolinmæði og skilning á börn. Bara elska Dexter!!

Fjörulalli... lesist "fjöruladli"

Ég gerði þessa síðu um daginn. Þessa mynd tók ég einhverntíma um vorið 2005 til að taka þátt í einhverjum þemaleik á barnalandi, já ég hékk þar víst um tíma... En alla vega komu nokkrar góðar myndir út úr því ævintýri. Ég man samt því miður ekkert hvað pp heitir sem ég notaði í þessa síðu en fonturinn á titlinum er ARTISTAMP.

Hvaða svipur er nú þetta?

Gerði þessa síðu í dag. Tók mig smá tíma til að ákveða LO-ið á henni. En það tókst nú með ágætum á endanum en þá tók höfuðverkurinn að finna pp við. Þetta er semsagt pp frá Wild Asparagus og LO-ið er mitt eigið. Ég vildi semsagt prófa að skera pp þannig að mynd eða annar pp kæmi undir og yfir (þeir sem eru ekki skrapparar fatta ekkert um hvað ég er að tala en þeim er bara nær). Semsagt að nota mynstrið í pp til að skreyta síðuna og myndina meir. Gera hana fancy. En myndirnar eru af Sesselju frá því að hún var lítil og þæg. Mig minnir að Gunna frænka hafi tekið þær því ég átti ekki myndavél á þessum tíma.

Dásemdarlíf.

Maðurinn minn er svo yndislegur, hann leyfði mér að sofa út í morgun og ég rumskaði ekki fyrr en síminn hringdi um hádegisbilið. Ég var að vinna um helgina og svo tekur það nú líka aðeins á að fara tvisvar út að djamma á einni helgi, sérstaklega þegar maður er kominn á þennan aldur og kominn úr allri æfingu. Ég hefði nú samt ekki gefið í það ef ég drykki ennþá. Ætli ég væri ekki bara ennþá að eða inni á klósetti að æla lifur og lungum. En um helgina var mér gefið fullt... Ég fékk litla sæta gjöf frá gamlingjunum mínum á föstudaginn þegar ég ákvað að gera pizzu í hádeginu. Það voru allir svo hrifnir af því að mér var hælt í bak og fyrir. Mér líður alltaf vel þegar mér tekst að gera þau ánægð. Svo í gær þegar ég ákvað að brytja niður suðusúkkulaði til að maula eftir hádegismatinn og skellti því á starfsmannaborðið þá gladdi ég eina hjúkkuna svo mikið að hún knúsaði mig. Mér þótti afskaplega vænt um það. Svo í staffapartýinu í gær var mikið um gleði og hlátur enda ekki við öðru að búast. En það er ein stelpa sem var að vinna með okkur á elliheimilinu en er hætt og flutt suður sem mætti í partý og ég fékk svo fallegt bros frá henni þegar ég mætti að ég fylltist hlýju. Svo þegar ég var að fara heim og kvaddi stökk hún upp til að ná tali af mér og tilkynnti mér að hún kæmi til vinnu aftur í sumar og ég yrði að vera að vinna meðan hún væri hjá okkur. Svo knúsuðumst við vel og lengi og ég hlakka til að hún komi að vinna aftur. Ég er alltaf að fá svona gjafir þessa dagana sem fullvissa mig bara um það að ég er að gera eitthvað rétt. Svo er það ekki verra að vita að fólki líki vel við mig bara fyrir að vera ég... það tók mig svolítið langan tíma að þora því af hræðslu við höfnun.

Djammið í gær...

Djammið í gær var yndislegt!! Við fórum semsagt á "menningarkvöld" skemmtinefndar kennaranna. Þar fengum við að sjá tvö tónlistarinnslög, annað um Smokie (living next door to Alice) og var í umsjá kennara stelpnanna minna og svo Eurovision innslag Jónsa míns sem fór á kostum!! Hann tók lög úr keppninni sem hafa unnið um- deildan sigur að einhverju leyti og dansaði og söng með nokkrum lögum! Hann Jónsi minn er æði! Svo var vínkynning á rauðvíni/hvítvíni (áfengislausum) sem var í senn afar fræðandi og skemmtilegt en því miður ógeðslegt á bragðið. Svo var endað með slidessýningu á myndum sem teknar hafa verið seinustu tvö ár á öllum uppákomum sem skemmtinefndin hefur staðið að og það er nú alltaf gaman að sjá gamlar myndir, sérstaklega þegar þær hafa verið teknar óvænt og myndavélasvipurinn á fólki ekki komin upp. Við vorum komin heim um eittleytið í nótt og héldum okkar einkapartý og fórum að sofa seint og um síðir.
En ég er búin að leggja mig og í kvöld er bara aa-fundurinn minn og rólegheit í faðmi fjölskyldunnar. En svo er ég að fara aftur út annað kvöld því það er makalaust staffapartý af elliheimilinu og ef ég þekki þessar hjúkkur rétt verður það líka æðislega gaman.

Strokið að heiman.

Ég gerði  þessa skrappsíðu um daginn... Er voðalega montin af henni því hún kom miklu betur út en ég þorði að vona. Pappírinn er frá Signature Suite og Bazzill, titillinn og skrautið er héðan og þaðan. Ég er búin að eiga þessa mynd af Karli lengi en aldrei treyst mér til að skrappa úr henni fyrr. Hún var tekin þegar við bjuggum upp á Hól og hann var nýbyrjaður að ganga. Hann langaði út en mamman var ekki að nenna því þannig að hann klæddi sig í skó af Sesselju og fór út. Ákveðinn ungur maður eins og við var að búast.

Helgarfrí...

Við erum að byrja helgarfríið og ætlum að skella okkur í sund með börnin. Og klukkan er að ganga sjö, sem er að mínu mati mjög seint fyrir sundferð. En þetta verður ævintýri.

Svo lengi lærir...

Ég læri alltaf eitthvað nýtt á hverjum degi og dagurinn í dag var engin undantekning. Í dag lærði ég það að það er ekki mjög gott að sjóða lummudeig áður en maður steikir það á pönnu.

Ég var að fara að steikja lummur og skellti tveimur pönnum á tvær hellur og kveikti á þremur hellum. Svo hrærði ég deigið meðan pönnurnar náðu hita og skellti svo stálskálinni fullri af lummudeigi á þriðju helluna sem var orðin álíka heit og hellurnar undir pönnunum en ég tók ekkert eftir því fyrr en ég var búin með meirihluta deigsins og  farin að furða mig á því af hverju deigið væri svona kekkjótt hjá mér... Þegar deigið byrjaði að bulla áttaði ég mig á hver mistökin voru.

Lykilorðið!

Eftir þessa blessuðu villumeldingu í kerfinu hjá mbl.is um daginn hef ég ekki getað breytt lykilorðinum mínu aftur í eitthvað sem ég man... þarf alltaf að fletta upp í póstinum eftir því. Af hverju í ósköpunum þarf alltaf að senda manni lykilorð sem inniheldur tölustafi innan um bókstafi?  Ég er með meinloku fyrir svona algebrujöfnum!